ما زالوا شهرين على الإنتخابات و مازلنا في هاك السردوك إنريشوا... إعتصامات مشروعة و غير مشروعة.. مطالب و مظاهرات .. و البوليس كان مظاهرة سلميّة تطالب بتصحيح المسار و المحاسبة يشد يدڨدڨها و يفلّقها و من بعد يَطلعلنا الناطق الرسمي بحكاية حولة.. و كان إعتصام متاع هوكش البوليس المسكين لا حول له و لا قوّة و يستنجد بالجيش.. هوكا ديما راس الهم دادا عيشا.
و الوزير السبسي ما نراوه كان كي فمّا لولة خاصة كيف كالأغلبيّة الماسطة يبداو يميلوا للقوى الثورية و ينقصوا من "وووووه باش إدخلوا لبلاد في حيط" هوكا سيدي الوزير يطلّ علينا و و يطمئلنا قلوبنا بكلمتين.. و مدّ ردّ يا حمد.. نرجعوا لنفس المعبوكة تقول واحد يتعامل مع ولده عمره 4 سنين ماكس
لكن المرة هذه شخصيا كنت نستانا في تحوير وزاري أو تسريع في الإجراءات...شنوة سيدة العڨربي تهرب قال شنوة تعطيل و تراكم القضايا؟؟ توّا يعقل هذا يا سيدي الوزير؟؟ راهو البلاد هززها الواد و تقول العام "بحيث".. و ربّما؟؟؟
باهي الحكومة هذه مؤقتة و متفاهمين ماشية على روحها في هاك الأيامات متاع 23أكتوبر المجيد إي و لكن هل اليوم المشهود كيفاش نوصلولوا أحنا سلامات في الضروف الحاليّة.. يا رسول الله واحد ماينجمش يعبّر على مقصودو؟ تي كيفاش خرج بن علي موش بالمظاهرات و عرفنا وقتها إلي 99% يحبوه يمشي و قالولو "ديڨاج"؟
أنا لا نحب نقول أنا ضدّ و لا مع الحكومة.. هي حكومة مؤقتة و متطوّعة باش توصلنا لبرّ الأمان و هي تغلط و تصيب .. و لكن نحب نذكرها و نذكركم إلي المدة الإنتقالية ما تقلش أهمية على المدة إلي باش يقعدها المجلس التأسيسي .. لذا نحب نذكر الحكومة إلي الكلنا عندنا الحق في تقييمها و نقدها و توجيه أصابع الإتهام لها إذا لزم خاطر الشعب هذا بالباهي و بالخايب اللي فيه واعي و أثبت ذلك فلذا خليولوا المجال يعبر و يزيوا من القمع راكم ما عندكم وين توصلوا .. الخوف راهو مشا مالشيرة الأخرى!!
صورة من عند ناصر طلال
مظاهرة يوم 15 أوت 2011
*كان ما فهمتوش هاي الغناية تفسر بالفلاّقي*
Aucun commentaire:
Enregistrer un commentaire