IN COVER

09 février 2012

ميني تدوينة .. باش نفرّغ قلبي

و بقدرة قادر .. الصفحات المأجورة على الفايسبوك (الله يرزيكم فيه) إلي عدّاتلنا جمعة "تنبّر" على الجمعيات و العباد إليّ لمّت مساعدات و هزّت قوافل للمناطق المنكوبة و قامت بعملها التطوعي إلي ما نجموا كان نشكروها عليه (تحطّ تصاور و إلاّ ما تحطّش على الفايسبوك ما يهمّش) .. الصفحات هذه اليوم تحطّلنا في أرقام جمعيّاتها باش تلمّ المساعدات و تشيخنا بالتصاور على الأنترنات.. بعد ما فلقتنا بإتهاماتها بالتهويل و بإلي الناس في الشمال موش محتاجة للمساعدات خاطرها مستانسة بالبرد و بإلّي أحنا كالعادة نسابوتيو في الحكومة .. سبحان الله مغيّر الأحوال.. لكن موش مشكل .. نحييوهم و نشجعوهم و زيادة الخير ما فيها ندامة أماّ زيادة التنبير هي الماسطة 



بوست سكيبتوم : ما نجمتش نشدّ روحي، أمّا البارح بعد ما توجه السيد خذر في برنامج "حديث الساعة" على القناة الوطنيّة ل"شباب النهضة" (و بعد زادها للشباب لخرين زادا، إي وه ميسالش) باش يساهموا في حملة التبرّعات و إلّي طلب إن تكون ذروتها يوم الجمعة هذه ... توقّعت هبّة من النوع هذا و عرفت إليّ حتّى واحد باش يعمل الخير في الدنيا لازم يستنى "الإشارة".. الحاصل لك الله يا تونس