ليوم سمير الفرياني سيبوه و روّح لدارو..
أنا فرحت و بكيت خطرني مشيت إلدارو و شفت بنتو الصغرونة.. أنا كتبت من منطلق العاطفة و ياسر متعاطفة مع عايلتو و صغارو و مرتو!! لكن اليوم و بعد ما فكّو أسرو عندي بارشا سؤالات :
1. إي هو سمير إشنيّ باش يقول لبنتو الصغيرة اليوم؟ وين كنت؟ وقتاه تعاود تغيب؟ قداّه تغيب المرّة الجاية؟ سؤالات تسهلمهم طفلة صغيرة و لكن حقها تسهلهم البوها اللي عدّات العيد و هو بعيد عليها.
2. سمير علاش قعد في الحبس المدّة هذيكا الكلّ ياخي القانون اللي سمحلو يخرج اليوم ما كانس يسمح باش يخرجو البارح؟
3. سمير باش يعاود يتحبس؟
4. تي هو أصلاً علاه شدّ الحبس؟
5. سمير زعمة شجاع ياسر؟ تي ما فيبالوش اللي كيف حكا هاك الحكايات وين باش ترصّي؟ إي و زعمة بعد الليّ ذاقو مازال يحلّ فمّو و يتكلّم؟ و غيرو زعمة يتكلّم.. خاطر ماك تعرف أضرب القطوسة تخاف لعروسة..
6. و زعمة علاه سيّبوه؟ خاطر بصراحة نشكّ إلّي هي إرادة الشعب خاطر ما ريتش الشعب ياسر متعاطف معاه.. تي الأغلبية كيل العادة أخطى راسي و أضرب..
.. الحاصل يزيني مالسؤالات اللي ما عندها وين توصّل خليني كيف الجماعة شادّا ببّوشتي و تحت الحيط إلى أن يأتي ما يخالف ذلك ~ مانيش نقصد في زعبع.. الله لا يخلفهولنا
و مِالإخر هذا سي سمير و حكايتو راس الفتلة .. و... أدرك شهرزاد الصباح ... و سكتت عن الكلام المباح
